資深音樂人盧冠廷今日現身金鐘，宣傳6月舉行嘅演唱會，太太亦有現身撐場。主辦商即場送上一棵植物畀盧冠廷，喻意佢係樂壇長青樹。盧冠廷接受訪問時，透露自己已有8年冇開過演唱會。「除咗6月嘅演唱會，5月我仲會出一隻新唱片。80年代我試過喺高山劇場開騷，嗰時唱到尾聲我要跪拜啲人先肯走，要超越之前實在有啲難度，所以今次搞到我騰騰震好大壓力！」

盧冠廷透露今次演唱會將會搞搞新意思，歡迎有才華嘅音樂人同佢合作:「呢個idea係我揸車嗰時諗到，香港有咁多有才華嘅音樂人，應該要廣泛招攬佢哋，無論玩樂器叻甚至拍枱拍得出色，只要佢哋拍條片放上我哋個官網，畀我揀選到嘅人都可以同我一齊玩音樂。」

佢仲即場分享自己多年嘅養生秘訣:「其實啲歌手話開騷要跑步練大個肺，我就坐喺度都可以，只要你每日深呼吸15下，用丹田運氣令到肋骨膨脹，咁做會更加健康。同埋記緊唔好食咁多味精同雞粉，食得多，到你老咗就好容易記憶衰退！」