WAGs者，即係搵銀極多嘅世界級球星嗰班老婆同女友（Wives And Girlfriends），而喺英國除咗碧咸嫂之外，史篤城前鋒高治（Peter Crouch）個老婆Abbey都係非常出名嘅WAGs。上星期Abbey湊住兩歲大囡囡Sophia逛利物浦市，同行仲有𡃁妹仔個婆婆同舅父，着住粉紅色中褸襯桃紅色褲仔嘅Sophia邊行邊推住個玩具吸塵機，一臉認真當正條街係屋企咁不停吸塵，點知婆婆拎嗰個紙袋突然爛咗，搞到啲衫跌晒落地，要舅父烏低身執番，狼狽到暈。另一方面，平時成日晒身材嘅Abbey突然着魚網裝玩自拍，內裏得番條底褲，睇怕都係影啲情趣相嚟畀高治睇啦。