當年今日

神秘善長廣寄慰問卡

蘋果日報 2002/01/07 00:00


聖誕新年剛過,今年大使摷勻成個信箱,先收到幾張賀卡,鬼咁失望。大家千祈唔好誤會大使人緣唔好,查實係𠵱家潮流興e-card(電子郵卡)。各方好友都透過電腦向大使送上祝福。不過,大使喺呢方面比較傳統,始終覺得e-card嘅感覺唔夠傳統賀卡溫馨。
講開又講,前排蘋果基金的確收到好多卡,但就唔係畀大使。而係有位署名阿生嘅讀者,託我哋將呢啲慰問卡轉送畀個案苦主。提起呢位善長,相信好多受助人都有印象,因為有百幾人收過佢寄出嘅慰問卡,上至長者,下至婦孺。

把握現在 重新振作
雖然阿生係男係女,係肥係瘦,大家都唔知,但人海茫茫,有人咁關心自己,好多苦主都覺得好感動、好溫暖,重成日叫大使幫佢哋多謝阿生一聲。其中早前喪夫,𠵱家同三個女相依為命嘅陳女士就同大使講,早幾個月佢老公因為心臟病突然過身,嗰刻佢簡直覺得天冧咗落嚟咁,世界冇晒希望。直至前排收到阿生送畀佢嘅一張卡,卡上面寫住:「人生的意義不在乎過去,只要把握現在,重新振作,前面的新天地將會展現!」陳女士話,睇完呢段說話,成個人就好似醒咗咁,心情亦輕鬆好多。
所以,大使成日話,做善事呢家嘢,真係有錢出錢,有力出力,哪怕只是一張心意卡,阿生嘅義舉實在叫人欣賞。

暖流熱線
電話:29908688
傳真:23702192
電郵:[email protected]
網址: http://www.charity.atnext.com