【拆局】
立法會就《2016年醫生註冊（修訂）條例草案》恢復二讀辯論，當中涉及改革醫務委員會問題，觸發醫學界反彈，泛民也紛紛轉軚，由支持變反對。有建制陣營指摘泛民為選票及政治考慮轉軚，令草案有被否決風險；泛民則指政府重犯版權條例錯誤，「以為夠票就懶懶閒」，結果令反對草案醫生聯合傘兵團體向泛民施壓，「根本唔轉唔得」。
有關條例表面上為病人權益改革醫委會，據知有建制不滿泛民為選票及政治考慮轉軚反對，公民黨更連該黨議員郭家麒提出的修訂就算通過，也不投支持票。

醫學界施壓　泛民轉軚

有泛民議員直指政府與建制派錯判形勢，「政府以為有市民利益做擋箭牌，泛民就算反對，都唔敢拉死條法例」，完全低估泛民政黨內有人對專業自主同樣執着，「唔可以因為市民利益，就可以削弱專業自主」，但政府明顯錯估形勢，以為手握建制支持票足以過關，未動員輿論攻勢，「到最後一兩日先有病人組織出嚟撐，完全唔知做乜！」
相反醫學界今次團結反政府，有泛民更稱，醫學界內活躍分子成功拉攏一班不同專業界別的傘兵團體向泛民施壓，「呢兩三個星期，除咗區耀佳、杏林覺醒出手，連資訊科技等唔同嘅傘後組織都不斷動員向泛民施壓」，政黨若支持草案、等同支持輸入內地醫生，憂選舉時要票債票償，政府卻似不知不覺，「根本係版權條例翻版，但發緊夢個局長由蘇錦樑換成高永文」。
■記者莫劍弦