陽光老孫噚日接受電話訪問,強調自己唔係斷背一族,佢話:「我梗係鍾意女人啦,嗰位係我選香港先生之後,同佢做完訪問後識嘅,好多時大家出嚟活動都有見面,所以熟咗,識咗三個月左右。」佢又話同相入面嘅兩名男性只係好朋友,唔擔心俾人誤會,陽光老孫話:「我都唔知乜嘢人喺我Facebook度攞相,同埋已經唔止一間傳媒搵過我。」佢又話為免再有不必要誤會,會將比較親密嘅錫面相刪除。
問陽光老孫家有冇拍拖,佢就話冇,但閒時會客串做健身教練,目前佢搵緊經理人公司準備發展演藝事業,成數仲好高。講開陽光老孫嘅斷背疑雲,其實選港男期間佢嘅花邊新聞多籮籮,不過都係話佢女,同男性就係第一次。