當年今日

隔牆有耳:煲呔視察雨災溫總上身 - 李八方

蘋果日報 2008/06/08 00:00


8日下午,中華人民共和國香港特別行政區行政長官曾蔭權親赴大澳,指導特區百年一遇暴雨的救災工作。曾特首堅定地訓示前線人員:「食水要源源不絕地供應給市民,絕不容許出現斷水的情況。」一名小六學生寫信給曾爺爺,訴說祖父母被困大澳的苦況,要求特區政府伸出援手……
上述只係八方睇完煲呔噚日坐直升機入大澳嘅片段,忍唔住手幫煲呔起草嘅新聞稿,事關佢一身嘅造型同表情,真係好似溫總上身,令人懷疑佢係咪喺度模仿溫總。溫總巡視四川地震災區嘅表現,贏得唔少好評;煲呔想學溫總,莫非係因為近排副局長同政治助理單嘢搞到一鑊粥,想藉此挽回民望?不過觀乎佢噚日嘅表現同市民反應,八方嘅結論係:學溫總?冇咁易!
empty
官方圖片
煲呔坐直升機指點江山,一副抗災總領導咁款。
政府新聞處圖片
empty
記者直擊
煲呔慰問輪食水居民時,有人大叫「曾特首,唔好當我哋係孤兒呀!」搞到佢面懵懵。
江寶龍攝
圖冲淡政治蠢才事件
煲呔噚日晏晝兩點幾,坐飛行服務隊直升機喺大澳一個球場降落。佢冇打煲呔,淨係着白恤衫同深色西褲,但就差對NewBalance波鞋,如果唔係都有九成似溫總個巡災look嘅。不過政府新聞處好嘢,派出攝影師隨團,拍低煲呔喺直升機上指點江山嘅神態,好似好指揮若定咁款。
去到大澳,煲呔即刻行過去碼頭。當時有成幾十個大澳居民喺度排隊,輪候水船臨時供應嘅食水。有居民向煲呔訴苦:「我哋好慘呀!」煲呔聽到一臉憂戚,仲即時指示工作人員,啲水要不停咁供應畀啲市民。不過,有大澳居民唔係好滿意政府嘅救災進度,忍唔住話煲呔:「曾特首,你唔好當大澳居民係孤兒!」煲呔就用領導人口脗,話今次係百二年一遇嘅暴雨,香港冇基建應付到,但政府一定會盡快恢復大澳啲交通同食水供應。
煲呔努力做騷之際,八方就收到一名自稱協恩小學六年級生梁皓為嘅讀者電郵。封信係寫畀「親愛的曾特首」,梁同學話每年端午節佢一家人都會到大澳同祖父母過節,但一場大雨,令大澳變成重災區。佢話前日下午開始聯絡唔到祖父母,祖母又有腎病,要大量清潔食水洗肚(腹膜透析),令一家人好擔心,到噚日朝早先聯絡到爺爺。
呢位小讀者質疑煲呔,大澳大部份居民係老人家,佢哋同外界失去聯絡一整日,啲路又封晒,當局點解唔派多啲消防員同警察協助居民?佢仲話四川地震全民關注,大澳居民就受到漠視,令佢對香港政府失晒信心咁話。

mailto:[email protected]