上星期四馬主H約齊肥仔豪、才子樂、編輯T、編輯W等去上海總會食午飯，金融許不久前自澳洲回流，亦聞風而至。馬主H諗住成班老友記都係馬迷中之馬迷，於是行經新世界大廈之時，買一份馬經排位版，拿住嚟同班友仔度打吡馬。報販猛咁大聲嗌：「上網賭」，馬主H一時唔知佢講乜，企喺度聽真吓，原來報販唔高興星期三夜馬第六場嘅賽果，即係韋達騎「超水準」抗議有效，替代薛順強隻「新年代」，成為頭馬。

點解要「上網賭」呢，條氣唔順，唔益馬會抽佣喎！相信係一時激氣之言啫，但賽馬抗議之事經常發生，呢次最大煲，當晚全場馬迷不滿董事裁決，噓聲之大、之長、之合拍，前所未見。
上到上海總會，人人齊集，獨欠才子樂，原來佢要採訪打吡大賽排位抽籤，要遲到。大家傾起韋達告薛順強之事，一致認為應該告唔甩，但事實係告甩咗，所以民意反應大到不得了，肥仔豪話佢個節目收電話收到手軟，都係馬迷嘈馬會嘅！才子樂趕到後，話成班行家聽薛翰賢、應加柏解釋，總之係各自表述，專業董事嘅意見與馬迷嘅意見，完全唔同。馬主H記得當年柏葛（一流頂班英國騎師）嚟香港騎馬，經常表演以弱勝強嘅超級騎功，就係前領之時，有意無意之間封住個位，後面隻馬無法完全發揮。點解柏葛咁樣贏馬，我哋拍爛手掌，薛順強偷師就被勾銷呢？