一間好嘅企業,其中一項重要工作係要識得如何管理投資者對公司的預期,中電信(728)董事長王曉初絕對係高手,自加入中電信後,即提供按月客戶淨增長及按季主要營運數據表現,連一年兩次嘅中期及全年業績,亦較過去詳盡。
不單只基金經理及分析員,就連對記者亦一樣,中移動上周記招喺晚上6點30分舉行,周三聯通記招亦喺晚上6點,只有中電信選擇噚日中午公布業績,下午3時30分舉行記者會,等大家多啲時間消化業績,其他中資公司應該向佢學習。
仲有就係,佢哋一路請分析員食午飯一路講業績;臨近復活節,記者會完咗後就送埋復活蛋(圖)㖭,公關手段高明咗。
早時台灣發生地震導致七條海底光纜損壞,令亞太區通訊及互聯網服務大受影響。噚日王總仲話,為避免類似事件再發生,剛簽訂一項協議,希望通過日本海,再建一條跨太平洋的光纜。佢仲不忘同公司宣傳一吓,話上次香港可以咁快恢復對外通訊,全賴中電信協助本地通訊轉載通訊服務。
[email protected]