港交所（388）終於幫旗下倫敦金屬交易所（LME）搵到行政總裁（CEO），係之前傳過三位大熱之一──倫敦國際金融期貨交易所前行政總裁Garry Jones（莊敬賢），9月30號返工。另一位大熱、LME副行政總裁Diarmuid O'Hegarty就畀六個月通知，劈炮唔撈。

李小加唔肯講人工

港交所CEO李小加請得Garry，當然讚到佢識飛咁滯。噚日兩人主持電話會議，李小加以Leader一字形容Garry，大讚佢係全球少有嘅人才，涉獵過好多範疇，包括市場運作、基建投資、資訊科技、產品管理、市場推廣、人脈關係、固定收益、外匯、衍生工具等等。
接觸過咁多瓣，Garry偏偏冇金屬交易嘅經驗喎？李小加即刻幫對方解圍，指LME有好多金屬交易嘅專家可以幫手，稍後仲會繼續邀請資深嘅業內人士加盟，LME未來發展亦唔只係金屬交易云云。Garry淡淡定咁話，上任後打算幫港交所拓展業務至不同領域，認為可以喺結算、商品、外匯、固定收益等方面發圍，港交所勝在願意花錢投資咁話。
講咗咁耐，Garry到底幾錢人工呢？李小加噚日點都唔肯講，叫大家等到明年睇年報。李小加果然係做過傳媒，知道一講Garry人工，傳媒肯定將佢嘅人工同李小加或者就走嘅現任LME行政總裁艾博賢比較，蓋過晒佢堆讚美之詞。

李華華
mailto:[email protected]

一副24字的對聯影響蔡瀾一生，今集《亂噏24》，蔡瀾為你逐句解釋！
點擊以下連結，全集即時重溫！
http://bit.ly/appletalk24