「點解做飛機師同寫字樓，都可以遲啲退休？」短片中小姊弟一問一答嘅對白好精警，「唔知點解，同一間公司會有唔同退休年齡」，可能連國泰航空行政總裁何杲都未必識答。最近國泰空中服務員工會就搵呢對萌爆嘅小姊弟幫手，拍攝最新短片，呼籲全體約9,000名駐港嘅空姐空少，支持延長退休年齡至60歲。

冀國泰延退休年齡

短片名叫「Happy birthday？生日……快樂？」因為對一班國泰空服員嚟講，生日大一歲，就踏入退休多一步。片中小姊弟嘅父親係空服員，仲差一年就55歲「被退休」，但兩姊弟嘅大舅父同二姑媽，喺同一航空公司做機師同文職，就可以65歲及60歲先退休，難怪細佬年紀輕輕都知道唔公平。
小姊弟表現淡定亦好純真，工會主席胡綺薇話，係同事仔女粉墨登場，上周趕工攝製，因為公司早前就延長退休年齡派發問卷，下月5日截止，工會希望短片喚起同事關注同支持延長退休年齡至60歲，因為退休唔係一個人嘅事，係一家人嘅大事。YouTube睇片： https://youtu.be/Xzop6DP1VlY