楊千嬅今日就會喺紅館舉行跨年演唱會，同大家一齊過聖誕同迎接2018年。今日大陸網就傳出千嬅有新動向喎，就係話佢將會參加大陸嘅歌唱比賽《歌手2018》，而同千嬅一齊參加呢次比賽嘅仲有台灣天后張惠妹，港台天后同場對撼，真係好好睇喎！

好多藝人o依家都好着重喺大陸嘅發展，好似早年喺大陸冇人識嘅G.E.M.鄧紫棋，就係參加咗《我是歌手2》(現改名為《歌手》)後係大陸爆紅，之後就有好多歌手都去參加過類似嘅歌唱比賽，好似李克勤、古巨基、容祖兒同林憶蓮等，齊齊返大陸掘金！《歌手2018》將會喺明年1月3日開始錄影，今日大陸網就傳出參加歌手嘅名單，包括有楊千嬅、汪峰、張惠妹、張韶涵、華晨宇、林宥嘉、樂隊逃跑計劃、英國女歌手Jessie j。

咦！唔係喎！今年10月，千嬅為C AllStar嘅演唱會做嘉賓時，佢曾經鬆口話：「可能我明年就退休，世事難料，人生喺唔同嘅階段，會發掘唔同嘅事，需要去珍惜，希望我第一次做你哋嘉賓，唔係最後一次，繼續做好歌畀大家聽。」(新聞連結： http://bit.ly/2pmlFrY )咁O依家有指千嬅會參加《歌手2018》，亦即係話，千嬅明年唔會退休住啦，千嬅嘅粉絲真係可以鬆一口氣囉！

而《蘋果》就聯絡到千嬅嘅經理人林珊珊，佢就話冇接洽過喎！

更多娛聞，喺晒《娛果》
http://fb.com/appledailyent