政府噚日宣佈成立「港台經濟文化合作協進會」同「香港──台灣商貿合作委員會」，多個局長係成員，官方色彩甚濃，亦可以話係港版「海協會」，協進會主席係行會成員李業廣，商貿委員會主席則係李大壯。

李業廣喺財金界德高望重，搵佢做協進會主席規格夠高，不過佢同台灣似乎冇乜特別人脈關係，煲呔欽點佢主持港版「海協會」，又搵中大校長兼行會成員劉遵義做顧問，反而唔將重任交畀去年訪問台灣嘅行會召集人梁振英，箇中玄機，不講自明。梁振英噚晚被問到點解冇份時，話自己已有好多公職在身，政府唔可以將太多公職集中個別人士身上，做少份好閒咁話。
既有經濟文化合作協進會，點解要架床叠屋另設「香港──台灣商貿合作委員會」呢？無非係做多個餅出嚟分餅仔，呢個商貿合作委員會主席係李大壯，八方相信一般正常人唔多識佢，最多視佢為紅頂商人一個，其實佢大有來頭，乃係名將張學良姪孫（李大壯本名張實，後隨繼父改姓李），93年已做全國政協，有能力直通天庭，後來加入自由黨，據講田少都要靠佢打通京城人脈網絡。
田少反23條做人民英雄，08年選舉滑鐵盧落馬，西環同煲呔都想打殘自由黨，李大壯打着紅旗反紅旗，變身「反田行動總指揮」，成功分裂自由黨，田少元氣大傷。事隔兩年，煲呔終於論功行賞，熟識李大壯人士指，李在台灣商界有不少人脈，至於對拉攏台灣是否特別有優勢則見仁見智，因為台、港商貿合作向來冇乜大問題，「呢啲分餅仔嘅位，其實搵邊個做都冇所謂。」
台灣方面同時成立台港經濟文化合作策進會做對口單位，據講由前財政部長林振國做董事長，秘書長由陸委會港澳處處長朱曦兼任。朱曦係倫敦大學政經學院法律碩士，屬專業外交、經濟官員，熟悉APEC同兩岸經濟協議（ECFA）談判，最為人樂道政績係促成澳洲致送幾十隻「國寶」級緝私犬畀台灣，被譽為「台灣緝私犬之父」。

mailto:[email protected]