下個月2號將會Ritz Carlton酒店舉行婚禮嘅楊怡同羅仲謙，婚禮已經進入倒數階段，今日有周刊報道話，因為婚禮太多事要兼顧，事關佢哋兩個都希望自己一手一腳籌備自己嘅婚禮，所以壓力好大，仲笑言經過今次之後，可以開一間wedding planner公司。

因為謙謙喺大陸拍嘢嘅關係，唔單止喺籌備過程只可以用電話同視像傾計偈，甚至乎婚禮之後，未必有時間去度蜜月，阿怡話可能同屋企人出去玩幾日，希望謙謙可以一齊去，生b方面，阿怡話隨緣喇，大家未有研究過，亦都冇時間表，況且太強求亦唔係好事，只要簡簡單單生活就可以。

楊怡喺明年又會參與舞台劇《我和春天有個約會》嘅演出，佢話最初謙謙唔贊成，擔心佢承受唔到，不過最後睇完套劇之後，支持老婆去參演。到時會唔會俾謙謙睇佢演出，阿怡話叫佢去睇尾場，完騷之後一齊返屋企！

楊怡回覆《蘋果》時稱:「心情不算好緊張，反而係婚禮好多細節未做好，所以比較大壓力，但都會盡力做好，希望當天大家都開心，謝謝吖！」