【誤做第三者】改埋電話堅決斬纜 何弘軒:對愛情已經唔再信任
第三者何弘軒
何弘軒噚晚喺銅鑼灣接受節目訪問,分享愛情經歷,話自己試過一次慘痛經歷,幾年前意外做咗第三者,當時佢廿幾歲仔:「拍咗年幾拖至知,散唔到,同女友拉据,拍拖時估到對方有蠱惑,以為只係準備出軌,冇諗過自己原來係第三者。」
點解甩唔到?佢話:「拍咗年幾有咗感情嘛,又冇咁灑脫,最後都係我主動同對方分開嘅,連電話都換埋,唔想佢搵到我,佢都有唔俾我走,但我堅決斬纜。」對方另一半係邊個?何弘軒話:「只係喺facebook見過嗰個人個樣,呢個女仔最近都whatsapp我,係通過我嘅共同朋友想搵我,但我已經當咗佢透明。」
至於o依家嘅感情狀況,佢話有拍下散拖,仲未搵到一個固定女友:「我對愛情已經唔再信任,經歷嗰次對寫歌都多咗靈感。」