當年英皇小花何嘉莉逃離娛樂圈多年，o依家做咗索媽嘅佢重出江湖，今晚喺facebook貼於錄音室唱《兩種人》嘅短片，寫道：「廿年沒進錄音室之旅～哈！又幾好玩喎！（其實我都真係好鍾意唱歌㗎）Just for FUN。鎮定！鎮定！只是練練歌而已！練來幹嘛？就是為了一個好玩的show。」

有網友留言支持：「依家興懷舊，你再唱的話必定很多人支持你。」仲有網友讚素顏上陣嘅何嘉莉：「人靚聲甜」。何嘉莉冇開估係做乜嘢騷，不過，噚晚佢貼咗身在大台嘅相片，估計係大台搵佢復出為《流行經典50年》演唱《兩種人》。當年被英皇放逐去台灣嘅何嘉莉，據知最近簽返畀英皇，大家都不計前嫌，娛樂圈果然係圓嘅！

擁有9頭身比例嘅何嘉莉，讀緊書已經被星探發掘，搵佢做「陽光妹」拍「陽光檸檬茶」廣告上位，96年正式加入娛樂圈拍電影《四個32A和一個香蕉少年》，97年同謝霆鋒拍MV後獲飛圖（即係o依嘅英皇）睇中簽做歌手，初出道已經橫掃樂壇新人獎，甚得老闆楊受成寵愛，連容祖兒都要企埋一邊！不過，99年傳聞何嘉莉唔聽公司話，結果被英皇放逐去台灣，幾年後和平解約，轉做幕後幫梁洛施設計形象，最後更完全離開娛槳圈。

06年何嘉莉嫁首任老公糖水店老闆黃逸璋，兩人育有一子Jean，14年結束9年婚姻，翌年低調再嫁飛機師Gerald Sze，去年誕囡囡Zoe。o依家37歲嘅何嘉莉外型keep得唔錯，有網友更留言讚：「真心覺得現在的你比少女時期的你更美」，何嘉莉都有回覆「Thank you」。

今日《蘋果》搵過嘉莉，佢喺電話表示：「其實20年冇入錄音室，都覺得好好玩，平時自己好鍾意唱歌，咁多年雖然冇入錄音室，但都會同啲朋友唱吓K。點解入錄音室呢，因為練歌for最近tvb好hit節目《流行經典50年》，咁耐冇出嚟演唱過，點都要練一練，對上一次唱歌係14年伍樂城作品展，當時出嚟唱咗兩首歌，事隔又幾年，今次上tvb節目，希望自己最好姿態出現，認真地練一練歌。」

精選娛聞，喺晒《娛果》
http://fb.com/appledailyent