衛詩雅o依家拍緊3部戲，但佢仲要捱眼瞓練渡海泳。下個月29號舉行嘅新世界維港泳，請咗詩雅做星級挑戰者，安排佢上特訓班，同三項鐵人教練備戰。雖然只係練習，詩雅媽咪一有時間就會去現場同個女打氣。經過一輪地獄式苦練，詩雅終於要面對佢最擔心嘅第一關，就係水試喇！

詩雅個樣驚驚咁話：「原來真正游海前，要喺泳池用45分鐘之內游到1,500米，我一直好擔心游唔到，訓練時游過最好嘅成績係37分鐘，希望今日可以40分鐘內完成。」雖然前一日因拍戲開夜班唔夠瞓，但一向做事有毅力兼拼勁嘅詩雅，最後以42分鐘成功通過水試，順利入圍，在場有大量其他選手為佢鼓掌打氣。

詩雅今年已有5套電影上映，目前有3套電影拍緊，呢位大忙人本來冇打算參加渡海泳，佢話：「但諗深一層自己同海好有緣，爸爸最愛潛水，我同細佬更誇張到齊齊考咗船牌，以前我又做過救生員，今次就當試吓自己為咗一個目標可以去到幾盡。」詩雅水試後，將會離港拍攝新片，出發前佢曾經問過劇組，酒店附近有冇海灘，因為佢要習慣游海嘅感覺。