古天樂噚日喺紅磡出席「微博之夜」，獲大會頒發「給力電影男主角」。一個星期三度封帝嘅佢心情大好，受訪時就話：「好開心、好榮幸，入行20年，憑住呢套戲（電影《殺破狼·貪狼》）拎3個獎，心情好興奮，遲啲會同朋友佞飯分享喜悅。」問佢係咪想延續到去金像獎？古仔就話：「隨緣啦，唔好諗咁多，我驚到時攞唔到好大穫。」

提到佢即將開拍嘅《尋秦記》電影版，古仔話嗰時拍電視劇拍咗8個月，同宣萱、林峯已經好有默契：「電視劇嚟講，拍8個月好難得，今次我好有信心項少龍會返嚟，我有時都有翻睇。」佢仲話劇本已經寫成，係電視版嘅延續，預計年底就會開工。

同宣萱、林峯17年後再度合體，林峯仲話自己愈來愈正，古仔又點睇？佢笑笑口話：「係囉，佢哋正啲。我哋始終敵不過年齡，人大咗就會成熟，係另一個感覺。不過唔好叫我做番10幾歲，我做唔到。」記者即笑謂項少龍好佻皮同搞笑㗎喎？古仔即刻好鬼馬咁話：「我冇佻皮過。」

精選娛聞，喺晒《娛果》
http://fb.com/appledailyent