（上回提要：暫時封掉陰陽眼、只能聽到靈體的靈界律師喬礎，卻要面對異常誇張的情況！）

「喬律師，我搵到啦，嗰間嘢好多年前，樓上發生過一單命案……」秘書小姐在電話中著急地道，我也在剎那間想到其中的關鍵，不禁打了一下頭，暗罵自己笨。

對了，多年之前，這棟大廈不是發生過一場極為恐怖的血案嗎？

「得啦Daisy，係Hello Kitty藏屍案嘛，我記得啦，唔該晒。」我平靜地說完便掛上電話，同時深深吸了一口氣，再次面對那幅牆，嘗試用一貫的口吻說話：「呢位女士，我知道你當年畀人分屍慘死，但係你已經留咗喺陽世廿幾年，你嘅靈力已經唔會剩返幾多，再係咁落去，你就會灰飛湮滅，不如快啲落去計咗數先啦。」

可惜，這次真的是對著一幅牆說話，完全沒有回應。難道是我猜錯了？不是當年藏屍案的怨靈？

我回頭看看阿Nick和Mandy，卻發現他們像看瘋子一樣看著我，我立即心虛地對他們解釋：「嗱我真係聽到牆入面有聲㗎……唔係自言自語。」可是我發覺，越解釋越可疑。

「喬律師……你……係咪唔舒服？使唔使返去休息吓先？」阿Nick擔心地說，在我看來卻甚是可惡。

「我無事……你哋咁多年都無發生過咩靈異事件？」我沒好氣問。

「梗係無啦，有嘅我一早就信你啦，」阿Nick斜著眼望著Mandy道：「直至呢個o靚妹招惹埋啲唔知咩返嚟。」

「咩呀？」Mandy漲紅著臉爭辯：「雖然我知咁樣接個客返嚟係唔啱，不過……我都係想快啲進步啫嘛。」

我連忙解圍道：「都唔關Mandy事嘅，邊個估到剪個髮會搞成咁吖？」

「咁而家仲有無得拆？我唔想報警呀，唔知會封舖幾多日。」阿Nick甚是擔憂地問。

我托著腮，想了一下才答：「你咁諗係啱，今日睇怕都要作個藉口收舖一日，我去查吓發生咗咩事啦。」

我正要離開，一把幽幽的女聲清晰地傳進我的耳窩：「畀返個頭我……我要扮返靚……」

這下我可是從頭寒到腳趾尖，再看看面色煞白的Mandy和阿Nick，就知道這次不止是我聽到了。

「鬼呀！」也不是誰先開始叫，我們三人同時奪門而出，再也不敢回頭望一眼。

我們由加連威老道跑到加拿芬道，才敢停下喘口氣。「咁……咁而家點算？」阿Nick上氣不接下氣地問。

唉，早知聽那位高人說，平時多練點體能，現在就不用跑半條街就氣喘如牛。我喘了老半天，才勉強答道：「你哋今日返去先……其他嘢我處理。」

（待續）

頭盔：本故事純屬虛構，如有雷同，實屬巧合。


尖沙咀髮型屋的無頭客⼈（⼀）
https://hk.news.appledaily.com/district/realtime/article/20180526/58234419

尖沙咀髮型屋的無頭客⼈（二）
https://hk.news.appledaily.com/district/realtime/article/20180602/58268796

專欄作者簡介：
說書⼈阿域
網絡⼩說作家、⾳樂⼈，出版作品《我做電話投注，每晚都會接到同一個⼥⼈來電》。

Facebook 專⾴：
https://www.facebook.com/atvolunteer

發掘更多⾝邊的⼩城故事，請 LIKE 蘋地 Facebook Page，並設定為「搶先看」： https://fb.com/appledailyland