唔夠3年前仲係德國高舉世界盃嘅功臣，但哥斯基奧斯近年發展未如人意，今年陪史特加落德乙總算有番唔少上陣機會，諗住重獲新生之際，點知周初同史特加青年軍喺市中心捲入毆鬥，唔單止俾人打到頭破血流，最慘係史特加周五以影響球會形象為由，決定同「大十字」解約，但就會喺場外繼續支持佢。

哥斯基奧斯喺記者會上含淚表示：「我想同所有擔心我嘅親友道歉，更重要係我衷心感謝所有史特加嘅同伴、球隊上下同球迷，我一直付出所有。我目前只係想靜下來，暫時離開職業足球，亦希望傳媒暫時唔好追訪我同屋企人。」呢位踢過多蒙特嘅28歲通天老倌每次落場一定搏到盡，希望佢嘅熱血他日再次喺球場上揮灑！