去過韓國旅行嘅朋友,都會同意當地人嘅英語水平同日本「有得揮」,而以成人學英文爆出笑話嘅題材,喺香港聽落好似好老套,但喺韓國就得到好大共鳴。所以張赫同李奈英嘅新片《完全征服英語》上映兩個禮拜都係韓片之冠,只係輸咗畀《22世紀殺人網絡3驚變世紀》少少。
對靚老師起痰
除咗英文情意結,俊男美女加韓國人一向好受嘅瘋狂搞笑,亦係《完》片成功因素之一。套戲講張赫為同自細過咗美國嘅妹妹溝通,去補習社學英文,點知天生愛識女仔嘅佢,一見到來自澳洲嘅「搣時」樣靚身材正,就連阿妹個名係乜都唔記得,重膽粗粗用英文向人求婚。無獨有偶,箍牙四眼妹李奈英俾上司下令惡補英文,但同樣掛住𠝹仔,重要係越級挑戰追靚仔張赫。結局係點?當然係最老套嗰隻啦!
話時話,我羅拉雖然未睇套戲,但淨睇預告片已經覺得張赫由《火山高校》同《開朗少女》嘅嚴肅佬,變身為搞笑好色鬼都幾掂。原來張赫做宣傳嗰時,都認過自己花心同鹹濕㗎!