馬賽BB與同性密友一齊去旅行？大字標題話「TB富婆豪包歐遊」？仲話馬賽BB「甜認拍拖」？乜咁突然呀……

其實個故仔係咁嘅。首先呢，今年8月，馬賽BB就去咗歐遊啦，去晒羅馬、巴黎、瑞士、米蘭，清晨漫遊，鐵塔食早餐，歎香檳等等。大家就會問，咦，同邊個去先？可惜並無提示，只係見到馬賽BB靚靚晒長腿同素顏樣，好pure，好想同BB一齊去。

事隔咗成兩個月，今日先至有報道話，當日馬賽BB係同「富婆」汪子琦一齊去。汪子琦個名咁熟？就係之前郭可盈經理人，09年涉嫌向外發放疑似林文龍偷食電話錄音，可盈兩公婆即開記招澄清，可盈更指有人敲詐，弄得滿城風雨。當時汪子琦留長髮，唔似TB喎。

估唔到事隔咁耐，汪子琦呢個名又出現，而且竟然同馬賽拉埋一齊。報道話馬賽此行全由汪子琦俾錢，馬賽主力做「三陪」——陪玩陪食陪買。有「知情人士」話:「賽賽一向熱衷識有錢人，知道汪子琦有錢兼喺內地娛圈識咁多人，睇中呢點就搭朋友介紹。」呢位知情人士仲話，汪子琦本來有一親密女友，但因為汪子琦同馬賽越行越埋，汪子琦仲成日飛嚟香港搵馬賽，令兩人感情生變喎。

至於馬賽又點回應呢？根據報道講，馬賽話汪子琦只係普通朋友，仲請大家唔好將二人拉埋嚟講。問佢是否接受同性戀？馬賽BB話:「呢樣嘢講唔定，緣份嘅嘢好難講!」仲斬釘截鐵承認:「係有發展中嘅對象，交往中!」噢no!!!!

之但係，去番汪子琦個微博一睇，發現成件事唔係咁樣。同行嘅，仲有一個女伴，原來佢係汪子琦工作室嘅合伙人，全程同汪子琦拖手仔又扮咀嘴兼抱抱，反而汪子琦同馬賽BB就保持距離。如果話馬賽係同緊汪子琦「過從甚密」，咁圖中呢位女性朋友又點解釋？

不過，馬賽BB喺情路上都好陰公豬0架，試過同巨聲大孖周志文交往，點知原來對方有個0靚模女友CoCo，更慘遭女方開咪、鬧爆馬賽搶人男友冇品；後來拍《法外風雲》又同陳智燊傳緋聞，被指當正對方正印宋熙年「死嘅」。依家話有拖拍喎……馬賽BB，你要戴眼識人呀!