【新增影片】呢排夜晚大家都狂煲大台嘅經典劇《創世紀II天地有情》郭可盈，到底觀眾鍾意《創世紀》嘅岑穎欣，定《創世紀II》嘅高美娜呢？郭可盈話兩個角色都鍾意，但現實生活佢嘅性格就係穎欣同美娜中間。

可盈今日接受《蘋果》電話訪問，佢話：「我好幸運演到兩個截然唔同嘅角色，美娜好癲，穎欣好斯文，我係佢哋中間。」可盈當年演技都備受讚賞，但佢今日睇番話自己仲可以做好啲，當年係因為好彩，身邊有好對手，可盈提到日前播出喺酒吧摑羅嘉良嘅嗰幕，可盈兜巴星嘉良，原來下下都出盡力：「越避忌越多take，佢越慘，拍呢啲戲，大家好講配合，巴巴要真打。」

可盈重看《創世紀》令戲癮大發，佢話：「有時會有戲癮，出唔出番嚟拍，最緊要係個故仔要吸引，劇力迫人先吸引人追。」可盈話囡囡津津翌日唔使返學，都有陪佢睇《創世紀II》，囡囡話好鍾意美娜：「可能美娜得意精靈，但髮型可以唔使咁亂，多謝大家支持。」