利物浦自從由高路普掌帥之後，表現越嚟越穩定，亦越嚟越有霸氣，令一眾利迷喜出望外。點知，喺周日作客般尼茅夫時喺領先3:1嘅情況下，喺15分鐘內失三球，結果反輸3:4，就真係傷盡紅軍躉嘅心。
雖然紅軍名宿加歷查喺賽後就狂轟今場「派膠」嘅利記門將卡利奧斯，話佢今季八場正選都冇場好波。不過，高路普仍力撐愛將，「你犯錯就自然會受到批評，我相信加歷查喺佢嘅職業生涯中，亦試過被人批評。不過，其實己隊所失嘅最後一球對門將嚟講係唔容易應付嘅，依家最重要係我哋全隊要返番去之前嘅氣勢。」
高路普仲坐言起行，帶紅軍到西班牙巴塞隆拿集訓兩日，貪嗰度氣候較為宜人同埋暖啲，而且大軍已經喺當地時間周日晚抵埗。不過可能因為剛剛輸波嘅關係，利物浦大軍個個都冇乜笑容，仲一臉倦容㖭呀！

溫布頓10分鐘入四球反吸

其實，紅軍喺15分鐘失三球都未算最慘情，非聯賽隊古遜艾斯頓喺周日嘅英足盃第二圈迎戰英甲嘅AFC溫布頓喺最後10分鐘失四球而出局仲慘情呀！古遜艾斯頓憑着摩根連中三元，戰至79分鐘都仲領先3:0，眼見可以爆冷晉級嘅時候，AFC溫布頓竟然連入四球，結果古遜艾斯頓就輸3:4出局。