【韓流】A Pink收男粉絲死亡威脅 覺偶像背叛衝動犯事
死亡威脅A Pink
【新增男子受訪內容】
韓國男團女團不時受到瘋狂粉絲嘅騷擾,當中有些狂熱粉絲或黑粉更會作出偏激行為。
好似之前女團TWICE嘅日本成員Mina因為同同門師兄團GOT7嘅泰國成員Bam Bam傳出緋聞而遭到死亡威脅。近日就到女團A Pink接到死亡威脅,根據韓國傳媒報道,於香港時間噚晚7時,有名男子打電話到江南警察局網絡偵查科自稱遭A Pink所屬事務所起訴佢威脅隊中成員,令到該名男子十分生氣,威脅話要用刀捅死A Pink成員,仲揚言一個鐘後就會到A Pink嘅事務所。
為咗保證A Pink安全,喺A Pink訓練所及宿所附近嘅警局即時派出兩名警員到場了解,並與保安一齊護送成員回家,目前仍未查出該名男子身份。
根據相關人士表示:「因為A Pink冇遇過呢啲事,所以佢哋都表現得好驚慌,因為似乎唔似開玩笑,已經向警察廳申請咗人身保護,如果事態嚴重會每個成員都安排保安保護人身安全,對於嫌疑犯會採取法律行動。」而A Pink今日就沒有活動,所以成員都唔會外出,如真係要外出會有經理人陪同,同時事務所亦已聘請私家警衛公司對保護全體成員。
另外,根據韓媒報道,該名男子接受傳媒訪問時自認係A Pink粉絲,為追星一直用咗唔少時間同金錢,當中佢因為睇到成員參加節目同其他男藝人聯誼約會時才感到被背叛,於是先作出咁嘅舉動,佢原意唔係想殺死A Pink。而成員夏榮今日亦有喺網上留言話自己因為接死亡威脅而搞到失眠,自己得知此事後亦十分擔心,但自己同成員會加倍小心。
今年2月先來港開騷嘅A Pink今年成軍6年,現時有6位成員,包括鄭恩地、初瓏、普美、夏榮、娜恩及南珠。