華華噚日係彭博睇到MatthewLynn寫嘅專欄,佢話呢班iBanker以前份工雖然單調乏味,同事間嘅相處又爾虞我詐,但起碼都有豪裝辦公室同豐厚花紅,即使唔夠靚仔,識女仔同喺婚姻市場都「有價有市」。不過今時唔同往日,iBanker已經唔再係一份夢寐以求嘅好工,𠵱家佢哋攞應得嘅花紅,都好似攞住支槍去打劫咁,情況簡直同神枱貓屎一樣,人見人憎。
Matthew仲話,有個紐約網誌收集咗唔少正在,或曾經同iBanker約會女士嘅痛苦經歷,而呢班自稱唔係「拜金女」口中嘅慘事,只不過係唔滿意過去優質生活不再。
好似有位網友話,佢男友出手冇以前咁大方,以往拍拖會去高級餐廳飲靚紅酒,如果呢招都唔能夠打動芳心,就隨時送Tiffany名貴首飾,誓要博紅顏一笑。不過,𠵱家就要去必勝客食pizza,埋單時仲要用優惠券攞折扣,最慘係要聽埋男友呻公司裁員嘅遭遇。