街工立法會議員梁耀忠唔撈啦！千祈唔好誤會，阿忠唔係辭職引發公投，而係因為年屆六十到咗退休年齡，教埋今個月就會結束32年教學生涯，8月放埋暑假就全身而退。回望教學生涯，阿忠話六四必定係最難忘嘅事，所以咁多年都堅持向同學講解六四，仲會訓練同學喺六四前夕朗誦89年北京學生嘅《絕食宣言》。

師生聯署譴責屠城

現時喺香港仔工業學校擔任數學科兼職教師嘅阿忠話，30年前開始喺呢間學校執教鞭，新高中學制未推出前，佢教預科Applied Maths，𠵱家就教中五、中六嘅數學科。校方好體諒佢嘅議會工作，多年嚟專登安排佢嘅堂喺最早兩堂，方便佢之後去立法會開會。
最難忘嘅嘢，梗係八九六四，阿忠話當年全校師生一齊簽名，聯署譴責中共屠城，簽名最終交咗畀新華社。佢多年嚟一有機會就會向同學講解六四，六四前夕仲會訓練幾位同學喺學校早會朗誦《絕食宣言》，感受吓當年北京學生參加學運嘅情感，八方相信佢唔會教學生用「蔡耀腔」去讀。
32年春風化雨，阿忠見證學生嘅態度如何滑落。佢話每個年代都有學生上堂瞓覺，但係十幾年前嘅學生，走埋去拍醒佢，都會尷尬知醜；𠵱家一叫醒瞓覺嘅學生，學生好似想打人咁款，即使老師都冇面畀。阿忠話冇咗中三淘汰試同中五會考，人人保證直升有書讀，變咗唔識珍惜，亦令尊師重道嘅精神「唔存在」。

mailto:[email protected]

Hit一o下，動全新
即刻去Google Play Store, 下載【蘋果動新聞】新版Android App:
http://bit.ly/appledailyupdate

自力更新方法：
1)到 Play Store
2)搜尋「Apple Daily」
3)登入蘋果動新聞App
4)按更新，即可動全新

iPhone新版App，將於7月登陸