當年今日

物質豐富寵壞小朋友
嫩細兒女:黃佩霞特訓Sporty囡囡刻苦堅強

蘋果日報 2008/06/08 00:00


「萬般皆下品,惟有讀書高」,可算是時下家長老生常談的理念,作為「瑜伽媽媽」的黃佩霞(Almen)卻有另一番見解,自小感染7歲半囡囡黃盟諾(Camelot)成為運動發燒友。Almen認為時下家長太過着重子女學術方面的發展,卻漠視運動的重要性,Almen指運動除能強身健體外,更能建立密切的親子關係。對於近年不時發生家庭倫常慘劇,Almen認為都是因為家長子女們太過脆弱,經不起挫折,故此自小培訓子女做運動,便是訓練他們求生意志正能量的好機會。 撰文:梁錦雯
黃佩霞與美籍丈夫RyanBlair的11歲囝囝Zanskar及7歲半囡囡黃盟諾,一家四口都是運動發燒友。Almen本身是專業瑜伽導師,Ryan則是代表港隊的越野運動員,亦是訓練企業要員團體領導才能的導師,二人公餘時間都離不開運動,更愛帶同一對子女攀山及露營等,生活十分規律健康。
香港不重運動
日前Almen帶同囡囡Camelot接受訪問,更大玩高難度的瑜伽動作,悉心糾正囡囡的動作之餘,並大談親子樂。其間小小年紀的Camelot十分好動,不時自發性嚷着要跑步,到健身室又玩Fitball,與母親一起做瑜伽拍照時,更充份表現出愛運動的細胞,而且不時表達意見,是一個有主見及外向的小女孩,絕對是母親自小薰陶好運動的成果。
Almen分享培育子女的心得,認為運動是十分重要的一環,她說:「自己做人媽咪梗係好想仔女琴棋書畫樣樣都得,不過我發現好多家長都太注重學術性的培育,太過一面倒,我同我先生都覺得學術同體育同樣重要,香港太唔着重運動,小朋友返學一個禮拜只得兩日有運動堂,喺美國,好注重運動文化,因為運動可以係建立親子關係的橋樑,我哋familyday會去行山、露營,增加溝通互助的機會,一家人會密切啲。」
Almen透露她懷着Camelot時不時會做運動,她說:「我陀住佢時都有做瑜伽,健身,佢出世時就教佢游水,三歲就學瑜伽,細細個就培養佢運動興趣,佢精力好充沛,佢daddy(指Ryan)運動樣樣精,平時會帶佢踩單車,游水,攀石,慢慢發掘佢啲potential。」
empty
Camelot05年出席媽咪與Ryan的婚宴時喜上眉梢,看來十分樂意接受Ryan這位新爸爸及新哥哥Zanskar。
empty
兩母女對望做出eaglepose動作,Camelot望着一臉認真的母親時,即忍不住笑起來。
遇挫折易放棄
Almen指運動除強身健體外,更是培育子女堅強的好工具,她說:「香港小朋友被寵壞咗,呢一代物質太豐富,太overprotected,啲家長好似幫佢哋起了一個太堅固嘅保護罩,我認為求生技巧好重要,𠵱家呢一代啲人好易就放棄,考試成績唔好就自殺,家長都好脆弱,面對唔到挫折,睇到啲家長攬住個仔女跳樓,呢啲倫常慘劇感到好悲哀,其實都係面對唔到困難嘅後果,所以我覺得小朋友自小訓練意志力係好重要。」
Almen續說:「人生得一次,過咗就冇,所以從小就要培養佢哋運動興趣,因為運動經常要面對刻苦呢一環,等佢哋喺運動訓練入面,培養克服難題嘅決心,要好好把握佢哋細個學嘢嘅機會,好易吸收,因為佢哋冇大人咁多心理障礙,佢哋學roller跌咗咪起番身再玩,但大人學就一味怕跌。」
7歲半的Camelot自幼於單親家庭長大,05年Almen與Ryan共諧連理,自此兩個單親家庭二合為一(編按:Zanskar是Ryan與前妻所生的兒子),Almen認為運動令到囡囡個性樂觀,亦有助她接受家庭的結構,克服一貫單親家庭的後遺症:「樂觀係佢優點,加上佢有兩個爸爸(指生父及Ryan)都好錫佢,佢有時都會揸住家庭照問我,點解唔同爸爸(指生父)結婚,不過佢同Ryan又相處得好好,都係同佢嘅開朗性格有關,又好似佢喺班入面,中文成績麻麻,但佢都唔會自卑,佢盡咗力,我唔會怪佢。」
empty
黃佩霞與Camelot母女齊心,兩人小心翼翼,互相配合做出朝天式的瑜伽動作。
empty
黃佩霞教導囡囡做拱橋,扶助Camelot撐起腰部。
分享工作趣事
Almen贊成以運動教導子女,亦同時鼓勵家長應該讓子女明白父母的工作環境,她認為:「我自己教瑜伽,都會帶埋個女去上堂,俾佢認識吓我嘅工作,係一個親子活動之餘,亦令佢體諒父母嘅工作,好似之前Ryan離開香港工作十幾日,返嚟啲仔女會問佢工作情況,佢就會將工作有趣嘅事同仔女分享,建立良好親子關係。」
小小的Camelot雖有主見,但同時也十分黐媽咪,二人關係十分密切,問到Camelot最喜歡媽媽甚麼地方,她即嬌嗲地表示:「最喜歡媽咪係最靚。」在旁的Almen即補充:「佢好緊我,行山嗰陣,佢唔要我行山邊,驚我有危險。」
empty
Camelot自小已經接觸不同運動,三歲便與朋友仔一齊學習獨木舟。
畫畫顯天份
Camelot現就讀本地傳統小學,問到Almen為何不安排擁有混血血統的囡囡入讀國際學校,她表示:「其實我問過好多家長,想仔女讀國際學校嘅主因係想佢哋接觸多啲英文,其實Camelot呢方面好足夠,平時喺屋企大部份時間都係以英文為主,加上我好想佢識中文,學習中國人傳統思想,所以咪安排佢入中文學校。」
empty
《3歲作品》
Camelot自幼愛畫畫,黃佩霞對愛女這方面的興趣當然多加栽培。
empty
《4歲作品》
提高中文水平
Almen透露Camelot的中文成績比英文成績差,故她不時以活動教學為她補習:「好似同佢行緊街嗰陣,要佢串連吓啲句子,活學活用中文,又喺屋企睇一啲簡單嘅故事書,同將佢幼稚園讀過嘅中文重複同佢練習,又會畀啲中文兒童百科全書畀佢睇,提高佢學習中文嘅樂趣。」
除周一至五的返學時間外,時下家長都愛為子女排滿密密的興趣班,Almen笑言也曾經成為盲流一族,她說:「自己初初做媽咪時乜都唔識,乜嘢興趣班都會試吓。𠵱家佢大咗,邊啲冇興趣唔鍾意嘅咪唔學,Camelot好鍾意畫畫,所以會繼續畀佢學,佢仲試過參加比賽攞過獎。」
育兒心得:別向孩子洗腦
Almen一家四口,由兩個單親家庭組成,對於作為Ryan兒子的後母,Almen坦言亦有磨合期,她說:「因為Zanskar十歲前喺同佢親生媽咪一齊住,𠵱家要一齊適應過新生活,生活習慣及模式都要重新tune過,彼此要多加了解,佢(指Zanskar)錫自己親生媽咪係一件好事,亦都係一個優點,我唔會話要取代佢親生媽咪嘅地位,呢方面我好尊重佢。就算技術上,佢媽咪做嘅事令我唔認同,但我都唔會畀負面嘅意見,一切會由老公Ryan出馬,以免囝囝對我反感,同埋我會畀多啲空間佢自己思考,到佢大個啲自然會識分析。」
Almen又認為單親家長應該注意的地方是:「就算對方(指伴侶)幾唔好,自己有幾憎佢,盡量都唔好畀小朋友知,更加唔好同佢洗腦,因為咁樣做會影響小朋友人際,男女關係處理,唔識得同人和平相處。」
食得健康少病痛
Almen一家十分注重均衡飲食,她認為食得健康與勤做運動同樣重要,她說:「我哋以白肉為主,再加上魚,菜同雞蛋,以均衡飲食,而我日日都要一對仔女帶水果返校。」正如拍攝當日,Almen與囡囡都是吃以海鮮為主的白肉,伴以蔬菜生果沙律,務求攝取高蛋白質及高纖維,Almen說:「我哋可能一家人成日做運動,又食得健康,平時唔會特別食乜嘢補品,凉茶都唔會飲,已經好足夠,甚少有病痛。」
empty
以健康為大前提的黃佩霞,認為飲食應以蔬菜及白肉為主。