40歲日本歌姬安室奈美惠本周末將於台北小巨蛋開唱，30個貨櫃已搶先抵台，而安室就係噚晚先抵達。

今午一點，安室就出動去小巨蛋綵排，一直排到傍點六點，之後開始一連串補充體力行動，第一站係位於國父紀念館車站附近嘅「LADY M」。安室一入去，先喺蛋糕櫃前駐足，短暫停留十分鐘，就由工作人員拎住蛋糕，離開門市。咁啱安室囝囝溫大聽日20歲生日，未知呢個係咪生日蛋糕喇。

之後安室返酒店唞咗陣，再出發去鼎泰豐，仲引起現場日籍遊客一陣尖叫，估唔到喺台灣都撞番同鄉喎！

安室一行人嗌咗小籠包、松露小籠包、蟹粉小籠包、牛肉麵、雞湯等等，幾乎招牌菜全包，花費約萬元新台幣。鼎泰豐門口聚集約200人爭睹安室風采，相當誇張。鼎泰豐老闆亦好體貼，送上肉包、糖水招待現場傳媒，期間仲有途人亂入想食免費肉包添！

安室此行真係大大滿足口腹之慾，噚晚甫抵台，即坐保母車直奔光復南路巷內嘅「燃 Moe 炭火燒肉三店」擦一餐。至於一班台灣fans都好有心，為咗安室引退前最後訪台，今天同後日於台北101點燈，打出「安室奈美惠」、「FINAL TOUR」、「～FINALLY～」等五組字樣，不少安室迷收工之後特登去101睇點燈，爭取最後的「合照」。