教育沙皇大戰唐唐，慢慢開始有睇頭。論政治智慧，梗係我哋香港本土出身嘅李國章高幾皮。噚日大學生想同佢舌戰，上午俾政府總部啲實Q以人太多冇報名為名擋駕，點知下午我哋「亞瑟王」就話：即管放馬過嚟，不過你哋要搞清楚，係唔妥我李國章，定係想打倒以阿董為首嘅特區政府。

袋錢落學生袋
呢兩套散手，耍得好靚。學生運動，一向都衰在只有激情，未夠理智。好似「六四」嗰鋪，天安門廣場啲大學生，就唔知自己「為何而戰，為誰而戰」，一時又話反貪污，一時又話要民主，一時又話要李鵬落台。焦點校唔準，主題太鬆散，整整吓就變咗情緒化，俾人舞龍咁舞。嗱，李國章今次就袋咗好多錢落學生個袋度嘞，佢嘅意思都重係：我都係同大家一樣反對削減教育經費嘅，如果想抗爭落去，問呢個政府攞錢喇。