上星期六（8日）係好多家長嘅大日子，皆因有好多間直資同私立小學喺同一日舉行面試，當中包括名字響噹噹嘅拔萃女小學、聖保羅男女中學附屬小學同埋聖士提反書院附屬小學等等，為咗下一代着想，家長幾辛苦都要帶埋子女去面試啦，名人一樣唔會例外。

面試僅半小時

日前有家長喺親子王國討論區度討論當日嘅情況，其中一名叫Janicelobby嘅家長就話見到影后吳君如帶住囡囡陳是知出現，原本喺呢啲場合撞見名人係好正常嘅事，但呢位家長似乎忿忿不平，仲懷疑有人「出術」㖭，佢話：「今天in（面試）St.Paul'sCo-ed（聖保羅男女中學附屬小學）見到吳君如同唐安琪，吳君如個女in咗冇半個鐘就出嚟，你估係唔係實收，所以唔使in咁耐？」佢又話之後仲見到陳可辛拖住囡囡出嚟，出動到一家三口，睇嚟應該實食冇黐牙啦！又難怪呢位家長咁緊張嘅，因為呢類名校都好鍾意收名人下一代，而且有家長話嗰日人人都要面試成兩粒鐘，係得君如面試半粒鐘咁優待。不過據知，君如亦唔係只見一間小學，佢同好多家長一樣都係大包圍嘅。