【新增影片】

傅家俊過關冇「符碌」！周四喺威爾斯舉行嘅球員錦標賽8強，香港首席桌球手傅家俊（Marco）面對一哥沙比毫無懼色，雖然開局兩度落後局分，但最終連取4局反勝5:2，昂然晉級4強！

Marco呢場波絕對唔易打，首局就俾沙比造出一cue 86度落後，扳平1:1後再次以27:97失落第3局。不過，Marco其後手風轉順，其中喺第5局同沙比大打防守戰，頻頻以「安全波」較量，最終單局苦戰46分鐘下險勝53:32兼首次領先局數，其後更連下兩城贏5:2晉級。對於4強對手將會係丁俊暉或者咸美頓嘅勝方，Marco表示：「兩位都係好強嘅球手，好高興見到小丁經歷家庭問題（年初喪母）後再次出戰，咸美頓亦度過一個好好嘅球季，無論對邊個都係一場硬仗。」

Marco早前喺中國公開賽外圍賽出局，所以完成球員錦標賽後，下月出戰世錦賽前會有約一個月時間空檔，佢透露會回港作最佳備戰。至於另一場4強，將會由8強以5:3淘汰羅拔臣嘅「機長」卡達火併鄧立普。