又係小S徐熙娣一家嘅報道…更正，係小S本人嘅最新消息。反而因為投資胖達人麵包店兼被指捲入內幕交易嘅許雅鈞，暫時都冇最新進展。最多只係又傳佢同小S離婚。

今日有台灣傳媒報道，指小S因為胖達人事件，形象受挫，就連代言工作都銳減，《康熙來了》收視跌，都變成小S罪名之一。之前小S幫佢代言多時嘅維娜斯推推脂塑身衣，月初仲出咗一輯新相，相中小S玲瓏浮凸仲俯身拋胸，姿態誘人。但噚日忽然盛傳，該品牌已徹換代言、飛起小S，改搵34E郁方。

報道指，小S同維娜斯合作7年，雙方一直合作愉快，而且啱啱先至續約，點知跟住就發生胖達人風波，指小S疑代言不實，且老公許雅鈞又涉內幕交易，令廠商收到唔少消費者抗議電話，報道指就連業績亦受波及；加上廠商本計劃乘勢推出一系列宣傳，不過小S呢個時間又唔方便露面宣傳，廠商迫於無奈，改為起用郁方。至於之前主打嘅小S代言電視廣告，稍後都會抽起。

據知，維娜斯因為同小S合作多年，總算有「情份」，故唔會公開話飛起小S，而係「修飾」為「搵多一個代言」，不過小S經理人就否認。而今日郁方出席維娜斯記者會時，就否認取代小S。佢話：「是幫忙小S，電視廣告以及目錄上代言人還是小S，她生完第3胎已經很久了，我剛生完，大家可以看到比較明顯的改變。」對於被指搶小S代言工作，郁方笑道：「我的目標不是小S，是XS（身材）！」

至於維娜斯方面就話:「不管發生任何狀況，維娜斯和小S的友誼是不會改變的，只是基於商業考量，必須做一點調整。」又話4月已經開始同郁方傾合作，同胖達人事件無關。