7.1遊行人數大減,有政界中人認為反映政改已經唔係市民最關心嘅事,嚟緊呢段時間可以休養生息。花生友聽聞有政界中人趁暑假去旅行之際,更多政界中人卻話暑假走唔開,事關年底區選在即,建制泛民都唔可以甩轆,呢次選舉更或影響建制派喺新東補選嘅出戰人選。
湯家驊辭職,公民黨如無意外派出湯大狀愛徒、現任新東支部主席楊岳橋出選,觀乎其他泛民無意出戰,似乎楊岳橋代泛民上陣都無乜懸念。反而建制派嘅部署,卻十畫未有一撇。查實,邊個建制派第二梯隊唔想透過補選谷吓知名度?其實從過往兩陣營選舉得票可見,泛民候選人若然喺新東協調只派一人落場,幾乎篤定sure win;建制派若然要落場,相信係要練兵多過要一席,各界抬轎助谷知名度,試問邊個新星唔想?