以前睇電視，有啲去醫院探病嘅場口，通常係一支葡x適或利x納，甚至係一包蘋果或橙，好啲嗰場叫有壺愛心靚湯咁啦。不過，最近探病似乎有新「潮流」，係帶日本清酒。

話說胡鴻鈞近日抱恙，佢已經喺Instagram度po過自己啲藥，仲話辛苦到要大嗌，點知，仲搞到入埋廠，噚日佢開貼相話自己因為入院而無法捧Dear Jane演唱會場，雖然佢個樣都精神，但見佢手上嗰啲插針……都知事態唔輕。佢老友許廷鏗都有去探病，休息咗幾日嘅胡鴻鈞，已經精神咗好多，另有唔少歌手朋友，好似張繼聰、張惠雅（Regen）等人都有留言問候，胡鴻鈞亦有覆人say thank you。

到今日，胡鴻鈞出得院，喺佢臨走前，仲有一位探病人士趕得切見到胡鴻鈞，就係上個月喺紅館開騷嘅吳業坤，佢好有心呀，一樣有趕去醫院，不過，佢啲探病物資有啲特別，係一支日本清酒，坤哥喺Ig留言話：「好彩趕得到佢仲係度，如果唔係就要自己一個人飲咗佢。」至於胡鴻鈞喺自己Ig貼咗同一張相表示：「臨出院俾佢趕到，算你有心琴晚收朝早6點瞓醒之後都過嚟探下我，不過下次可以唔使送酒，多謝。」

Check番支酒，係「白雪昭和純米酒」，酒精濃度達15度，如果以720毫升size嚟計，喺香港超巿應該賣過100蚊，日圓價都仲係約82蚊就買到。先撇除錢嘅嘢，探病都係講心，但係點解坤哥會諗起攞支酒去探病呢……