騎士NBA總決賽不敵勇士，衞冕失敗，新一季都預期陣容大變天，不過最先走人就係現任總經理大衛格芬，雖然佢嘅合約要到6月尾先到期，不過班主基拔已經向佢發出和平分手嘅公開信，意味格芬不獲續約下離隊；勒邦占士（LeBron James）都係個人Twitter留言，感謝格芬三年嚟嘅貢獻。

講真騎士GM都係惡做，事關眾所周知勒邦占士先至係真正GM，有咩球員交易、同邊個續約，都要大帝點頭。不過呢份工都竟然有退役球星肯做，據報前活塞、金塊名將比立斯（Chauncey Billups）好大機會接任騎士GM，以佢活塞時期拎過2004年總冠軍兼FMVP，又同大帝喺明星隊同美國隊合作過，應該同佢有傾計，大家攜手執番靚騎士個陣再挑戰總冠軍。