張繼聰同謝安琪今日喺迪士尼樂園為次女張靖(Karina)舉行百日宴派對，Ball Room門口有好多粉紅色汽球同迴旋木馬，充滿童真。

張繼聰同Kay之後出嚟見記者，呢位靚媽好耐都冇出席公開活動，今日見到Kay，明顯比之前瘦咗啲，但仍有少少水腫。提到Kay收身收得好快，Kay笑話：「其實唔快喇！」但佢承認有做運動，主力係負重量運動，舉吓鐵咁，佢話：「因為我身邊嘅人(老公)都俾咗好多靈感我，令我覺得事不宜遲，要快啲起行。都想快啲練到馬甲線，但好似同啲線唔係好friend。」記者讚佢有事業線喎，Kay話：「o依家冇喇，事業擺埋一邊喇，家庭行先！未諗復出，好享受同小朋友相處時間，同埋大仔都10歲，都要好多時間傾偈，兩個都照顧，諗嘅嘢都係喺佢哋身上先！」

由一家三口變成一家四口，問到Kay有冇品牌邀請舉家出活動？佢話：「有呀，我一一感謝佢哋，但我冇出席，因為呢段時間想專注喺屋企，真係擺低工作。」佢仲透露有一定數字犧牲，不過最重要都係家人開心：「我見到佢哋開心就得，尤其係我個仔同媽咪。佢兩個真係好開心。」

講到哥哥張瞻，記者問到佢有冇幫手照顧妹妹，Kay話：「真係冇喎！佢只係成日錫佢囉，可能年紀相差太遠，佢真係好錫妹妹囉！佢又就緊暑假啦，就應承咗幫手照顧妹妹，換片時就幫手掉垃圾，餵奶就幫手遮住囉！」Kay仲話想堅持餵到一年人奶。

問到兩人有冇為囡囡儲教育基金？Kay承認一定有計畫，老公張繼聰就講明唔係虎爸虎媽：「會同哥哥一樣，自由發展，最緊要係心靈富足，我哋唔係個種要個女學好多嘢。」同會同哥哥同一間學校？張繼聰話：「希望啦。如果唔係我要做埋司機，就打幾份工。」