年宵市場今日開鑼，hmv老闆蕭定一投資咗6位數字喺維園擺攤檔，今日張建聲同姜文杰(Benji)就去到維園宣傳，同時仲帶埋另一半陳嘉莉(Kelly)同李泳淇(Rain)造勢。

由於張建聲喺網劇《反黑》招積一角大受歡迎，攤檔專誠製作咗「招積」嘅咕臣同電話殼，而Benji為《反黑》製作嘅啤牌同t恤都有得賣，張建聲連番多謝老闆阿一投資，仲笑言賺到錢就自己袋，佢話：「今日開咗單㗎嘞，都好大壓力㗎，清唔晒就自己攬，盡可能會每晚都抽時間落嚟。」佢哋仲爆每晚都有《反黑》演員撐場。

問張建聲會唔會開拍《招積》外傳？佢就話要問導演宋本中，因為版權係佢嘅，張建聲仲爆話：「第二季努力寫緊劇本，因為第一季有啲唔完美嘅地方，要花啲功夫喺劇本上。今次會有荷里活演員參與，但唔可以透露住，Netflix會繼續投資支持第二同第三季，製作上會大啲。」而張建聲亦形容今次《反黑》係奇蹟，一於用本土班底做好本地創作，仲話《反黑》係佢嘅一生。

除咗多謝老闆，張建聲都即場多謝女友Kelly，仲咀嘴以示答謝，佢哋話情人節都拉埋女友一齊喺維園睇檔，張建聲仲笑爆Benji會向Rain求婚，Benji就反擊指張建聲會結婚，睇嚟今年即將多幾單好消息！

最港電影大獎投票網址
http://bit.ly/thekongestfilmawards

精選娛聞，喺晒《娛果》
http://fb.com/appledailyent