放暑假嘅日子，唔少星爸星媽都會湊小朋友去主題樂園玩，潮媽陳慧琳（Kelly）噚日就趁住假期，帶一對囝囝「蝦餃仔」劉昇同細仔「小龍包」劉琛去香港迪士尼樂園遊玩。

喺台上係時尚人辦，潮流嘅指標，喺台下，Kelly即刻變返幸福潮媽，Kelly噚日打扮隨意，穿上Zara濶身牛仔褲、架上Loewe太陽眼鏡、A.L.C.間條上衣襯黑色背心，唔講唔覺Kelly着呢件原來係男裝背心嚟，呢件品牌AyeGear嘅背心係專為爬山人士而設計，品牌標榜防水、擋風同多袋，連ipad甚至乎電腦都放得落，Kelly呢件就內藏26個袋，將湊B用品塞進去，佢就可以兩手揈揈咁專心湊仔，相當方便！正所謂「人着衫，衫着人」，Kelly着啲咁功能性嘅衫都可以咁fashionable，當然係「人着衫」啦!

「蝦餃仔」亦同時着住間條T恤，母子裝出巡！據知Kelly係個知慳識儉嘅潮媽媽，佢從來唔會買名牌服畀一對囝囝，買嘅都只係一啲品質較好嘅衣襪，而哥哥大得快，佢哋支持環保循環再着，細佬「小龍包」就只好「執二攤」嘞。