49歲、於80、90年代做藝人的彭文堅，之後轉行從商，現時係中國融保金融集團主席同執行董事，佢感情生活最令人有印象就係09年同模特兒陳祉妤（Balia）結婚，不過結婚只有3年，因男方偷食而搞到離婚收場，而Balia近年就生活富貴，透露同金融才俊拍拖。

二人離咗婚咁多年，關係仲保持到做朋友真係好難得，日前佢哋呢對過氣夫妻就約埋去咗大坑聚一聚，當時大概12點幾，佢哋就喺林子善開嘅茶記開餐，二人就揀咗近路口位置坐，方便睇住泊喺街邊嘅坐駕。彭文堅就不時食食吓飯，就行出街邊講電話，見佢一手煲住煙，另一隻手就手舞足蹈，講得十分興奮，前後就行出行入咗4次，可見佢都非常忙碌，而Balia就顯得有點無奈，亦有玩電話解悶。

最後，二人食咗半小時就走人，Balia就負責埋單，佢哋就各自去攞車，原來二人都揸名貴跑車，女方就揸瑪莎拉蒂，而彭文堅就揸住以佢英文名「Nixon」自訂車牌嘅Audi跑車，臨上車時道別時，Balia就忽然提佢，叫佢唔好將啲衫擺入洗衣機洗，似乎都關心對方日常生活瑣事。

《蘋果》致電Balia，問到佢同前夫彭文堅聚會，佢就笑言：「我哋係好好朋友，間唔中都會約吓，半年、一年都會約一次聚下，平時會講電話多啲，見面比較少。」講到彭文堅掛住出去煲煙講電話，佢就笑笑話朋友係恃熟賣熟：「好似我同班女性朋友出嚟，有時大家都係忙玩電話。」之前，Balia喺活動透露已有感情固定朋友，問到佢知唔前夫感情狀況，佢就話無乜特別問：「佢唔講我都好少問。」

記者大讚佢同前夫分手仲做到朋友難得，Balia話：「唔關事，唔係有咩唔好嘢upset到大家，分開咗都做到朋友，上一次結婚都係因為爸爸嗰時有淋巴癌，加上感情發展到嗰程度，先有咁嘅形式。」問到佢自己感情穩定會唔會考慮再婚，佢就表示：「o依家襯後生，加上有其他工作要兼顧，都想多啲時間陪媽咪同兩隻狗狗，媽咪都年紀大，身體都會有小毛病，都要成日鞭策佢注重身體，我自己都要身體好，先有體力大家周圍去，同埋兩隻狗狗，都11同13歲，舊年都做過手術，總知o依家都係自己、媽咪同狗狗行先，再結，唔結婚，都要睇緣份，如果適合嘅話，唔會唔考慮，亦唔會為結婚而結婚。」

精選娛聞，喺晒《娛果》
http://fb.com/appledailyent