由busker做到歌手嘅黎曉陽，喺觀塘工業大廈嘅天台搞音樂會，顏卓靈、周國賢等做表演嘉賓，黎曉陽表示第三次搞呢類音樂會：「香港比較難搞呢啲騷，因為要揀個地方，唔會有噪音畀人投訴，又要睇到日落。」

黎曉陽同顏卓靈合唱《野孩子》時，顏卓靈反問點解會揀呢首歌，黎曉陽就話覺得啱feel。問到會唔會作歌畀顏卓靈？黎曉陽：「當然好想合作。」而顏卓靈都話好想有自己音樂會，但要儲多啲歌先，嚟緊就會做新歌，亦有學鋼琴，男友白只有冇同佢交流音樂心得？顏卓靈表示：「冇呀，不過知佢想搞音樂會，但相信佢唔會搵我做表演嘉賓，因為佢實在太害羞。」

周國賢就講笑話知道有啤酒飲所以嚟，其後先正經表示：「其實想問吓黎曉陽關於busker嘅嘢，因為自己唔熟，只係喺街睇人busker時，被邀請快閃唱咗一首歌，同後生仔合作好開心，可以交流吓。」