昨日講起民主女神像與中大學術水平一事,左丁山認為不可混為一談。舉個好簡單嘅例子,你鍾意徐立之,就話徐立之學術水平高,你唔鍾意劉遵義,就話劉遵義學術水平低?得唔得呀,如果你認為得,水平低嗰個就係你。徐立之與劉遵義兩位校長同在國際學術界享有聲譽,一個係基因專家,一個係經濟專家,但兩人治校嘅作風唔同,各有所好,不過中大人素來勇於發言,自由到極,香港嘅大學之中,只有中文大學嘅歷任校長在校時一一被痛駡過,無一倖免。好人如高錕,當年咪一樣被人駡得厲害。
中大行政與計劃委員會(AAPC)有二十九名成員,除四名行政人員外,其他全是著名教授,包括諾貝爾獎得主,中國科學院院士,美國科技界著名學者,台灣知名歷史學家等等,純講學術嘅話,可說陣容鼎盛,無知人士話中大學術水平低,真乃夏蟲不可語冰。
至於AAPC不記名投票,決定「民主女神像」不宜在中大校園永久擺放一事,根本與學術水平無關,各人可有不同意見,左丁山接觸之中大校友之中,有人贊成,有人反對,有人無可無不可,意見並不統一;以中大人之勇於發言風氣,有贊成嘅校友因而痛駡AAPC,並不出奇,如果冇,先至係奇哉怪也。一位校友係太極高手,人人知道佢打太極有真功夫,但佢嘅太極功力與做中學校長嘅功力有無關連呢,當然係冇!但如果有人話佢做中學校長之時出現學生犯罪事件,係「九流校長」,順便批評埋佢嘅太極唔掂,梗係荒謬o架啦。