奶媽強推修改逃犯送中條例，已經到咗犯眾憎嘅地步，唔單止引來全港各界聯署反對，佢嘅民望亦「低處未算低」，再咁落去點樣仲有credibility施政？最可笑嘅係阿「家超」之前唔知係咪鬼拍後尾枕，話內地依法治國，只係喺執法過程中，內部或有某階層嘅執法人員未依法律。咁即係佢都變相承認「依法治國」係門面嘅說話，實際喺執法層面的確存在緊有法不依嘅情況。呢個咪香港人反對送中條例嘅其中一個主要理由囉！

奶媽當初為求一己私慾，諗住借台灣殺人案，推動修改逃犯條例，然後向中共邀功。原以為泛民一嚿飯，點知佢哋喺議會「激烈抗爭」，不但無引起市民反感，反而引嚟更多支持同關注。政府同建制派諗住霸王硬上弓，咪捉蟲囉！有人就話，最唔好彩嘅係遇着中美貿易談判傾唔埋欄，中共要發動「抗美援天朝」行動全面反擊，香港咪要配合「國策」作出犧牲，等國家有多件武器同美國鬥。呢種講法，完全無道理同唔合邏輯。

首先，中共近年收緊對港政策，中美貿易談判係咪衰咗，西環都會開口力撐奶媽修惡法。第二，香港根本唔需要咁樣作出犧牲，唔通中共真係會喺香港拉一兩個美國人返去做「人質」？一旦真係咁發生，個衝擊會好大囉，引嚟嘅國際輿論指摘同埋可能出現嘅制裁，唔單止香港司法、政治同經濟無法承受，就連中共也抵受不住個後果，除非你話要閉門鎖國啦！第三，透過喺香港修惡法，嚟向美國施壓示威，係咪傻㗎，其實同用自殘嚟威脅他人無咩分別。

好多人講到口都臭，話有其他方法解決台灣殺人案嘅疑犯移送問題，逃犯條例修改無迫切性，應該從長計議。但奶媽「志不求易、事不避難」死都要堅持，加入「送中條款」，仲要定下死線要立法會盡快通過，根本係禍港、害國。再加上，依家中美貿易戰升級至經濟戰爭，奶媽要匆匆修法，咪俾美國大條道理多張香港牌嚟打囉，對於中共嚟講，根本就係添煩添亂，喺戰略上完全無咁嘅必要。事實上，好多西方國家都睇緊香港嘅風吹草動，佢哋都出聲表示對香港修惡法嘅憂慮，搞到出現埋建制派所謂嘅「八國聯軍」，呢啲係咪義和團拳民上身嘅奶媽自招呢！

修例一通過，香港與內地區間最後嘅法治屏障勢必失效，「一國兩制」蕩然無存，信心崩潰，外國不再視香港為國際金融中心，取消埋獨立關稅區地位、免簽證待遇，外商感受不到應有嘅保障必定撤走，香港經濟到時真係玩完。唔通奶媽夜闌人靜，真係無喺佢宣稱相信嘅天主面前諗過，修例後對香港嘅負面影響同埋做成嘅傷害係無法彌補，甚至可能成為佢嘅罪孽？

退多三千步，代入中共角度去諗，香港喺修惡法後「一國兩制」破產、信心崩潰，咁樣係咪就最符合佢哋嘅利益呢？要靠修呢條法例嚟彰顯主權？根本無咁既必要；要對付敵對派系借香港人身份走資、轉移國有資產？都唔係第一日嘅事，唔使咁急做吓？至於中美貿易戰，唔通要「冚世界人」犧牲嚟抗美？好無謂同好蠢囉，香港絕對唔係中共用嚟部署反擊倒嘅棄卒。相反，即使中共要同美國長期鬥爭，喺策略上都需要有回旋、轉彎嘅空間，所以香港依然有佢嘅存在價值，係一步活棋。唔好忘記，香港喺內地經濟改革開放嘅過程裏面，有着至為關鍵嘅角色。雖然係枝頂心杉，但內地想要繼續對外開放，就要容忍香港嘅特殊地位，而唔係咁樣壓迫香港人。中共喺呢個時候仲以「敵人支持我反對，敵人反對我擁護」嘅鬥爭邏輯行事，咁樣搞香港，根本係行錯棋，令整個棋局被堵死，只會後患無窮。

聞說，中共建政後，有兩次機會收番香港，但都在最後一刻叫停。其中一次喺文革爆發嗰陣，中央文革小組改變港澳政策，命令左派喺香港挑起「六七暴動」。到後期，周恩來問老毛係咪有意收回香港，老毛話無，周恩來便叫停香港暴動。老毛當年搞文革禍國殃民，但仍有一定嘅國際視野，身邊慶幸還有個周恩來，但今天自比老毛嘅習帝，身邊仲有無夠膽識、眼界同智慧嘅謀士肯出聲呢？真係天曉得。香港人唔想俾奶媽拖累，明日應該走出來表態！

花生評論員

-----------------------------
新聞有價 你肯為《蘋果動新聞》付幾多錢?
https://hk.adai.ly/QDTT6y5mgX