【新增影片】
凌晨突然宣佈退出民主黨的南區區議員區諾軒，今午與南區黨友、民主黨副主席羅健熙、柴文瀚進行facebook直播，解釋退黨決定。羅健熙在直播中表示，之前已知區諾軒有意退黨，過程中完全沒有挽留，「因為你識佢(區諾軒）之後，知道佢做咗決定，你就無謂搞佢嘞，呢個係我的心態」，指早前一直有與區商討退黨時機，所以「我哋好有心理準備的狀態」。

區諾軒則指，知道不少人都對自己退黨一事未有心理準備，指決定如令人感到不快，「我係希望講聲唔好意思」。區諾軒指，過去不時都與民主黨立場未必一樣，「我都走啦，不想將啲嘢講咁多」，解釋選擇現時退黨，是因為覺得相對過去來講，民主黨正處較順境時間，黨內運作良好，近日法庭判決加上DQ案，不少現時被政府打壓的社運人士，都是他的朋友，「我覺得我可以用我的位置，希望為進步派朋友做多啲事情」。

區諾軒又表明，自己無打算加入其他政黨，因為覺得現時自己的定位，可以做得比較多事情，「我可以幫不同團體，我剛做完民陣召集人，相對同其他不同團體關係都可以，特別處理地區上面，希望可以畀到意見佢哋」。區諾軒又指，雖然退黨，但未來會繼續與羅健熙和柴文瀚緊密合作，會繼續與羅健熙設聯合辦事處，如常服務街坊，「南區的服務不變，我唔希望退黨影響對南區街坊服務的任何一點」。

問到退黨是否與準備參加補選有關時，區諾軒表明，自己退黨一事，與補選沒有任何關係，又指「我哋係要講助選，嗰幾個議席都係被政權取消資格，個位係佢哋(被DQ議員)的，佢哋攞返係天經地義，我係想幫佢哋攞返議席」。區諾軒又以港島區為例子，指「眾志出咩人，就要幫佢助選」，又指「我同熱狗係死敵嚟」。

區諾軒其後再補充，自己除了不加入新政黨，亦不會加入政府，重申不希望退黨與補選扯上關係，「我哋唔好講補選，應該講助選，如果有條件，各黨應該眾志成城去做好件事，時間唔係好多」，又指將來最希望是推動更多人做地區工作，「我諗都算響應緊戴耀廷的風雲計劃」。

對於退黨聲明中，談到民主黨可以擔任泛民第一大黨，區諾軒解釋，民主黨現時擁有最多議席，在議會中力量較大，「其實有條件真係做某種的領導」，舉例指當議會出現新議題時，民主黨可以找出議題當中的問題，再帶回泛民商討，再決定是否反對，「民主黨有空間咁做」。

對於民主黨與民間團體的關係，區諾軒指，自己過去著重的角色，是參與很多社會運動團體的行動後，將訊息帶回民主黨，坦言「有啲憂慮」自己離開民主黨後，「(黨內)會少咗人做民間團體同社會運動的事情」。區諾軒又指，希望民主黨能有大黨氣度，「唔好介意人哋批評，唔好咁上心」，更希望民主黨不能放棄社運，「要有社運意識，先可以有革新的諗法」。

區諾軒又稱，最希望民主派減少內秏，指進步派道德高地較高，很容易就作出批評，但他認為事件並非如此簡單，「如果講啲嘢做唔到，就只係得個講字，既然有道德高地，更加要批評得合理，唔好做啲唔負責嘅批評」。區諾軒又指，雨傘運動後，不少無政黨人士都勝出，認為不同民間團體，可以有更多合作，坦言未來一屆區議會選舉，中共一定先去除零散力量，「如做到啲合作，不需要整個黨，起碼大家互相交流經驗，或者地區發展有多啲協調，對我哋處理將來地區工作有好大幫助」。

民主黨副主席羅健熙則指，本土自決派和溫和派各有不同想法，認為「兩條路線各有各做都好，大家唔係好鬧交，已經可以做到好多嘢」，認為若要迫民主黨支持自決派，或者迫自決派支持民主黨，都是十分困難。

談到昨日公佈退黨消息的過程，區諾軒指，「我噚晚諗咗好一陣子先按(退黨聲明)出去，都諗咗十幾分鐘」，指昨晚宣佈退黨後，暫未回到所屬選區，「我做決定前，有諗過街坊點諗，有諗過街坊會唔會唔開心」。羅健熙則指，「你問我，我都有啲擔心，但相信會處理到」。