鄭秀文、古天樂、Supper Moment、陳凱琳等今日喺尖沙嘴，出席YSL彩妝派對。

Sammi後日（19日）生日，佢話今日推出嘅新碟就係賀佢生日。呢次唱片封面，Sammi好性感咁着泳衣加西裝褸，佢話：「係呀，不過都係一件頭，三點式就仲犀利，我自己着三點式都OK㗎。」但佢就話唔會着三點式影寫真。講到生日願望，佢話：「開開心心，身體健康，其他乜都係假，仲有努力工作，依家心態唔似N年前咁衝喇。」新碟入面，其中有首歌同韓國組合GOT7成員王嘉爾合唱，Sammi就讚後輩：「哇，佢好犀利㗎，ig有1千萬follow。」

正日生日當天，Sammi會去澳門為Fans開演唱會，佢話等咗好耐：「其實呢樣一直都想做，係為咗fans先做，如果去唔到fans唔緊要，因為會有DVD。」佢笑言批准許志安過去澳門，咁批唔批准安仔上台唱歌？Sammi就搖頭：「唉，冇眼睇。」Sammi話本來本來想二人世界，但8，9月都好忙，依家都係工作為先。

安仔之前話會織冷衫送俾Sammi，仲會織自己個樣，Sammi都知道，但就唔睇好：「係呀，佢叻過我，識得講織幾多針，可能佢亂噏，如果佢真係織到我就着下啦，不過佢個鼻咁大範圍，有排織啦。」

精選娛聞，喺晒《娛果》
http://fb.com/appledailyent