13%交81% - 左丁山

蘋果日報 2012/12/10 00:00


十一月三十日本欄提及美國富翁及普通人嘅稅率(平均數),一位讀者來郵話自己係美國公民,交稅嘅稅率高於文中所述數字,要求提供美國稅局嘅報告。左丁山該文源於一篇報CNN或CNBC報道,但原文唔知去咗邊,上網搜查,一時之間搵唔到,請讀者自己上網搜尋。美國稅法十分繁複,海外公民另有AMT稅項,計到你煩,故此稅率人人不同,不可一概而論。每年到咗報稅時間,就有唔少揸綠卡嘅朋友想話放棄綠卡,算鬼數,不過睇吓陳光誠新聞,又覺得要有一卡傍身,心裏十分矛盾。
香港人交稅情況又點呢?財政司司長曾俊華在十二月三日上立法會滙報經濟情況,向樓市潑冷水,不說也罷,財經事務及庫務局常任秘書長謝曼怡向立法會講公共財政,其中有提到香港人交稅情況,反而值得一講,根據謝曼怡PowerPointt資料,香港有一百五十二萬一千名納稅人(按:最新就業人數約三百七十六萬人,即係話有過六成人唔使交稅),在2010/11財政年度,百五萬名納稅人交薪俸稅共443億元,佔政府收入總額嘅12%,平均實際稅率係8.1%,真係幾低㗎,恨死歐美人士!稅率隨每年收入總額上升而上升,譬如每年收入十萬八千至十五萬元嘅納稅人,平均實際稅率係0.3%,收入在三十萬元以上嘅,係4.9%,一百五十萬至三百萬嘅,稅率係14.2%,幾合乎累進制原則。除稅率之外,高收入者交嘅稅款亦係最高,二十萬個納稅人(佔納稅人總數13%)所交嘅稅,佔政府總薪俸稅收入之81%,呢二十萬位納稅人頂起不止半邊天,千祈唔好移民走人呀!
睇呢啲數字,唔覺得本港稅制有乜唔妥,高收入人士交稅率最高,交稅款最多,所得之政府派糖及津貼最少,從不投訴,算唔算公道呀?由此想起,若長者生活津貼(特惠生果金)無資產審查,呢二十萬位納稅人年過65歲之後,一樣可以申領,對年輕納稅人又公唔公道呢?政府用錢要審慎,唔好左派右派,慷納稅人之慨。澳門年年派錢,係慷強國人賭徒/貪官之慨,有「劫富濟貧之義」,香港則無此奢侈!