小小超李澤楷同梁洛施傳出緋聞，而佢同混血兒女友羅愛欣（Rachel）嘅戀情亦隨之而畫上句號。自從同小小超分手之後，Rachel好積極咁物色新男友，幾個月前，曾經有傳媒影到Rachel同一個外籍猛男拖手行街。

連踩兩夜場

不過，未知新戀情係咪仲未能夠填補Rachel心靈上嘅空虛，前晚馮仁昭見佢好落寞咁同一個中性打扮嘅朋友蒲吧傾心事，仲連踩兩場，傾足4個鐘！
前晚8點幾，Rachel獨自到銅鑼灣開平道一間酒吧，大概15分鐘之後，一個中性打扮嘅朋友嚟到，Rachel叫咗杯紅酒，朋友就叫咗杯啤酒，見Rachel一邊向朋友吐苦水，一邊飲酒剝花生，好似好唔開心咁。到9點半左右，Rachel將剩低嗰半杯紅酒一啖飲清光，然後同朋友行去附近HenryHouse樓上嘅酒吧傾偈。
Rachel同朋友喺酒吧傾到凌晨12點半先離開，睇嚟佢真係有好多心事同人講，Rachel同朋友離開HenryHouse之後，行落去軒尼詩道，然後各自搭的士返屋企。