皮蛋林自加拿大回流之後，一直租屋住，每隔兩年租約期滿，就搬一次屋，幾年前住響廣播道，一千呎，月租二萬零，另加車位租金、差餉。三年前搬去沙田駿景園，千二呎，月租二萬六、全包宴，業主畀晒管理雜費差餉及車位一個。年幾前租約滿期，地產代理話業主要加租，皮蛋林話費事還價，滿約立即鬆人，去咗鹿茵山莊，千四呎新樓，月租（全包宴）仍然係二萬六千元。

呢晚食飯時見到皮蛋林，問佢住鹿茵山莊滿意否？佢話：「好好，好鍾意，不過大仔自加拿大回來，地方唔夠用，已經搬咗去悠然山莊咯。」悠然山莊喺大埔，稍為偏僻啲喎，由廣播道去到悠然山莊，愈搬愈遠，方唔方便呀？皮蛋林話：「有架車，點會唔方便。最緊要計數，嗱，複式二千一呎，夠晒地方住，連天台可以搞燒烤活動，業主只收月租二萬六全包宴兼一個車位免費，空氣非常清新，朝早聽到雀仔叫，有乜唔好？」
梗係好啦，月租二萬六幾年不變，居住面積就愈來愈大，valueformoney就係咁嘅意思。去年有地產代理商猛咁唱「供平過租」，信親都死！呢，鹿茵山莊附近嘅滌濤山莊又削價求售嘞，《星島》地產版話滌濤山莊兩個月內跌價兩成，再跌落去，又會生產另一批負資產。皮蛋林冇樓一身輕，生活愉快，皆因冇心理負擔也。