【新增動新聞】
各位住喺黃埔嘅街坊，明年嘅區議會選舉，你哋嘅選區，再起風雲！消息話呀，喺黃埔東盤琚多年、曾經遭青年新政游蕙禎挑機嘅經民聯梁美芬將會「金盤洗手」，退下火線，交棒讓位後生仔。至於上屆成功喺黃埔西勝出、有「鄺葆葆」稱號嘅前青年新政成員鄺葆賢醫生，八方就聽聞建制派擬派曾喺青衣區選敗陣嘅工聯會友好出戰。

2019年嘅區議會選舉，仲有約一年半就開打，唔少想挑戰區議會議席嘅人士已準備就緒。黃埔花園喺屬九龍城區議會共分為兩個選區，就係黃埔東同黃埔西，2007年起喺黃埔東當選區議員嘅梁美芬，聽聞唔會再爭取連任，交棒畀經民聯後生仔李超宇。早排李超宇就替民建聯鄭泳舜喺黃埔助選，以示對建制派團結嘅忠誠。

本身喺城大教法律嘅梁美芬07年勝出區選後、08年贏埋立法會，雙料議員嘅佢更因捉老鼠成名，獲頒「鼠王芬」稱號。聽聞熟悉《基本法》嘅佢有機會喺某重要建制架構佔一席，八方早前問過佢，佢只係笑笑口話一切仲未作實。

而喺黃埔西嘅青政前成員、係公立醫院醫生嘅31歲鄺葆賢，上屆以傘兵之態成功剃建制派眼眉，剔走原建制議員當選。建制派下屆誓要搶回呢個位，有意派出上屆喺青衣敗陣嘅33歲鄭曉玲出戰。鄭當年喺青衣又派糭、又量血壓，搞咗個「凝匯青衣」組織做埋召集人，點知搞足一年半都係輸，「凝匯青衣」facebook已再無運作，當時有消息話，鄭曉玲同工聯會關係密切。

從小到大都住喺青衣嘅鄭似乎已由青衣「移民」至黃埔，近月開咗個facebook戶口，有張黃埔號嘅相，戶口朋友只有一個。八方問佢係咪想喺明年區選挑戰鄺葆賢？佢就搬咗個官樣答案：「言之尚早！」八方搵過鄺葆賢同游蕙禎，想睇吓佢哋點睇黃埔新形勢？係咪仲情繫黃埔？兩人截稿前未有回覆。