陳靜(DaDa)自從喺2013年憑《低俗喜劇》嘅「爆炸糖」一角攞咗金像獎最佳女配角，近年都專注電影方面發展。雖然冇再出噴血寫真，但DaDa間中都會喺社交平台派福利。

噚日DaDa突然喺ig上載咗一張泳衣，只有半身，見唔到頭，不過身材就真係睇到人「嘩嘩」聲。DaDa一個側身，23吋纖腰，盡現玲瓏浮凸身材。有網民戲言問﹕「你想殺人咩？」

DaDa今日接受《蘋果》電話訪問，原來只係一年前嘅舊照，佢話﹕「大家都以為係新相，其實我係想警愓自己，可以操番咁fit。」佢透露最近成日周遊列國去旅行，嚟緊8月就會正式開新戲，減肥同增戲都係為咗工作，佢話﹕「嚟緊會拍兩部戲，原本有一部要增肥，但時間有啲調動，要拍咗唔使增肥嗰部先，所以依家又要減番肥，拍完一部先再增肥。」

精選娛聞，喺晒《娛果》 http://fb.com/appledailyent