新春期間，好多朋友出外度假。珠寶L成家人飛去冰天雪地嘅波士頓，當地嘅查爾斯河新年前竟然結上一層厚冰，實屬罕見，不過珠寶L嘅親人住在波士頓，凍極都要去。佢行前一日，叫夥計去ABN-AMRO銀行（ABN以前叫做荷蘭銀行，同好多珠寶鑽石商往來）入票，原來全中環都冇一間分行，要去到銅鑼灣時代廣場先至有一間，𠵱家啲銀行縮皮真係縮得好誇張也。
醫生C就同太太去曼谷，住在君悅，取其位於四面佛旁，方便太太還神。左丁山話：「你太太係日本人，都拜四面佛？」

醫生C話：「世事好奇，佢閒時做開小生意，發唔大，舊年跟我去曼谷拜四面佛，拜完之後冇幾耐就返日本，無意中接受傳媒訪問，竟然俾一位日本公司老闆睇到單訪問，引起佢注意。回港後，日本老闆打電話搵我，自動送上日本新貨品銷售代理權，太太歡喜到極。現在生意做得唔錯，大家開心，所以太太堅持要去曼谷還神！」
世間事，何其巧合，拜一拜，還了心願，有何不可。曼谷四面佛香火不衰，有其道理。醫生C行醫之餘，攻讀中醫，隨時可以轉行做中醫師。中午飲茶之時，順便問佢：「有啲咳噃，點搞？」醫生C會同我哋把吓脈，幾過癮。
律師C亦有同好，喺港大SPACE讀咗五年中醫畢業，左丁山若有病，隨時可以搵業餘中醫攞意見，又幾方便噃。